|
Ja händ ihr euses Tante Trudi gseh
si isch nöd öpe 80zgi, nei vill vill meh
lang isches her, sit sie s 1. Mal hät glutscht amene Nuggel
ganzi 95 Jahr, hät sie hüt uf ihrem Buggel
s ganzi Läbe hät sie sich wacker durekämpft
und nüt hät je ihre Muet dämpft
us minere Jugend erinnere ich mich no genau
immer ufem Velo isch sie zu eus heicho,die gueti Frau
Für ihre Sohn Ernst hät sie immer alles mögliche gmacht
hät früehner gschaffed, fascht Tag und Nacht
für Ihri Grosschind hät sie später gläbt
hät au ganz vill mit ihne erläbt
Für alli hät sie immer es offnigs Huus
niemals wiest sie öper zur Türe us
de Marcel und d Hannelore händ sie s letscht
Jahr no zur Urgrossmuetter gmacht
keis Wunder, dass sie da übers ganzi Gsicht lacht
En ieserne Wille, mängisch fascht ächli stur
so fahrt sie doch no vor es paar Jährli ganz ellei Richtig Chur
Vor luuter Gepäck hät mer das chline Fraueli fascht nöd gseh
und en Journalist hät dänkt oh jeh, oh jeh
das Bild vo ihre, hät ihn ganz entzückt
so hät er schnäll de Fotoapparat zückt
Es Föteli heimlich vo ihre gmacht
und sie sogar id Ziietig bracht
Em Tod hät sie scho mängs Schnippli gschlage
und trotzdem ghört mer sie nie chlage
Sie isch de Meinig, nur wäg de Schwedetropfe läbi si no
dänn die häts sie immerhin scho vierzg Jahr gno
ja euses Tante Trudi, es chlises Phänomen
mit ihrem Schwedetropfe System
Also, liebs Tante Trudi blieb gsund, mach wieter so
dänn sind mir alli zäme froh
|
